21 мартыште Тÿнямбалне поэзий кече палемдалтеш. Тиде кечын Мустай библиотека шке омсажым кумдан почын, да поэзий шÿлышан, тудым йӧратыше кумылан-влакым порын вашлие.

Тидланже амал ыле «Поэзий - шулдыран йолташ» лÿман мероприятийыште самырык почеламутым возышо Татьяна Токтарова дене вашлиймаш эртыш.

Татьяна Пошкырт кундем Чорай ялын ÿдыржо. Шке илышыжым Тоски ял рвезе дене кылден, кызыт Шернур селаште илат. Поэзий шагат моткоч икшырымын эртаралте. Татьяна Вячеславовна шке профессийже дене англичан йылмым туныктышо, но тунамак, творческий кумылан ÿдырамаш.

Мероприятийыште тудо поэзий корныш толмыж дене палдарен да возымо почеламут-влакшым «Уна улам тÿняште» сборникше гыч лудын пуыш. Чолга ÿдырамаш тыгак сылнын мурен да куштен мошта. Йоҥгалтарыме муро-влак мероприятийыш толшо влакын кумылыштым нӧлтыш.

Вашлиймаш годым школ годсо почеламутым шарналтышна, а Нина Мамаева поэт Н. Золотаревын почеламутшым сылнын йоҥгалтарен каласкалыш.

Тыгай вашлиймаш, кажнын чоныш куаным, сай кумылым да поро шарнымашым пыштен. Татьяна Вячеславовна деч умбакыже у почеламут-влакым вучаш тÿҥалына.

М.Н. Казанцева, Мустай книгагудо вуйлатыше